iluarsaerĸingnerup Tysklandime sujumukarnera

Lutherip nalunartumik támarnera Tysklandime tamarme uípatdliutigineĸarpoĸ, tamane aperĸutigineĸartarpoĸ. tusatsiagkat ernumanarnerpât angatdláneĸarput, ĸavsîtdlo toĸutausimasorât. aliatsangârtut amerdlaĸaut, issertúngitsumik ikíngutaisa akornáne pĩnamtik, tûsintiligpagssuarnísaordle sule iluarsaerĸingnigssamik ersserĸigsumik igdlersuilersimángitsut akornáne. ĸavsît ilungersorturnik ugpernarsaivdlutik toĸutaunera akiniarumavdlugo neriorssuíput.

katûgdlit pissortaisa ĸanoĸ sákortutigissumik akerdlilerneĸalersimanertik ánilâĸalutik takuvât. nauk Lutherip toĸutausorineĸarnera nuánârutigerĸârsimagaluardlugo inuiaĸatigît narragsimaneránut sivitsortínago torĸorsínaunigssartik kigsautigilerpât. Lutherip akeraisa akúnermingnĩkatdlarmat suliai sapĩnerpât mãnákut periarfêrúneranisut agtigissumik akornutigisimángilait. kamangârnermingne iluarsaerĸingniartunik ĸunusuitsumik toĸutsiniarsimassut mãnákut ĸunussorssuángorput periarfêrússauvdlune mátússaulermut. ilât oĸarpoĸ: "aniguiniásaguvta periarfigssatuarârput naneruardluta silarssuaĸ tamât ujardlerfigalugo Luther inuiaĸatigîngnut táussuminga ĸaerĸussissunut utertíniásavdlugo." kaisarip perĸússutâ kinguneĸarsimángivigsutut píssuseĸarpoĸ. pâvip autdlartitai kamagtorssuangorput kaisarip perdlorĸússutâ Lutherip ĸanoĸ pisimaneranik aperĸutaussumit uípatdliutigineĸángínerungârmat.

Lutherip nauk tigussaugaluardlune isumángnangitsumik najugaĸarneranik nalunaerut inuiaĸatigît tugpatdlersautigât, sujornatiggornitdlo alutorinerulerpât. atuagkiai aitsât taima soĸutigineĸartigalutik atuarneĸartalerput. inuit amerdliartuínartut angut táuna ĸunusuingârdlune Gûtip oĸausianik igdlersuisimassoĸ ilánguvfigissalerpât. iluarsaerĸingneĸ píssagtíkiartortuáinarpoĸ. periarfêrúneĸarnermine autdlarsimatínane sapigagssaraluaminik nãmagsissaĸarpoĸ. sulissugssat avdlat sujuligtaissortik pingârtorssuaĸ pêrsitaugatdlartitdlugo akissugssáussusermik nutâmik misigissaĸalerput. nutâmik ugperdlutigdlo ilungersûtigissaĸalerdlutik sujumukarnialerput táussuma taima atarĸinartigissumik autdlarnigâ akornuserneĸarĸunago pisínnunertik tamákerdlugo sulíssutiginiardlugo.

Wartburgimit angerdlarêrame Lutherip testamentitâmik nugterinine inerpâ, mãnalo tyskit îvangkîlio nangmingneĸ oĸauserissamingnut nugtigaĸ pigilerpât. nugtigaĸ tamána sagdlusuíssúmik asangnigtunit tamanit nuánarineĸardlune ilagsineĸarpoĸ, inuínaitdle tusagainik ilerĸuinigdlo nuánarissaĸarnerussut nikagalugo narrugât.

palasit ánilângaleĸaut inuínánguakuluit Gûtip oĸausînik perĸússutainigdlo oĸaloĸatigisínaulísangmatik, nangmingnerdlo nalússusertik pâsinarsísangmat. inuínartut erĸarsartausiat anersâp panânui akiũssutigssáungilaĸ. ilagît rûmalerissut píssauneĸarnertik tamât atordlugo bîbilip siaruarterneĸarnigssâ akornusersoraluarpât, kisiáne perĸússutait perdlorĸussissarneratdlo tamarmik kinguneĸángitdlat. bîbile perdlorĸuneĸartoĸ sukanganerujartortumik inerterĸutigineĸartitdlugo ajoĸersûtinik ilumut ĸanoĸ ítunik imarissaĸarnera inuit pâsiumavdlugo kigsautiginerujartuínarpât. nangmingneĸ atuarsínaussut tamarmik Gûtip oĸausia pilerivdluínardlutik ilisimassagssarsiorfigât. bîbile sumutdlũnît angalagângamik nagsatarissarpât atuartuartardlugulo ilarujugssua alángârsínaulerângamíko aitsât nãmagilersarpât. testamentitâp ilagsivdluarneĸarnera Lutherip takugamiuk ernĩnaĸ testamentitoĸaĸ nugternialerpâ, ingmíkôrtuisalo ilânik inigaĸarângame ernĩnaĸ atuagkiaritítarpâ.

Lutherip atuagkiai igdloĸarfigssuarme igdlorpánguaĸarfingmisut ilngsivdluarneĸartigissarput. "Lutherip ikíngutaisalo atuagkiai avdlanit angatdláneĸartarput. mátútut mátútutut neriorssûtit inatsisine túngavigssaĸángíneránik ĸularissaerúsimassut ilatsĩnarungnaerdlutigdlo suliumassut, taimáitordle Gûtip oĸausia nalunaiautigísavdlugo naluvatdlârtut, igdlorpaĸarfínguit igdlúnguitdlo atausiákât angalaorfigalugit Lutherip ikíngutaisalo atuagkiai nuisítarpait. sivitsúngitsoĸ Tysklandime taimatut ĸunusuitdlutik angalaordlutik atuagaerniartartut amerdlivdluínarput." (D'Aubigné).

atuagkiai tamáko aningaussautiligssuarnitdlo pîtsunitdlo, ilisimatûnit ilíniarnertũngitsunitdlo soĸutigingnigdluínartumik atuarneĸartarput. únúkut igdloĸarfínguane ilíniartitsissut inugpâluit katerssũsimassut atuvfátarpait. ilungersuanertigut tamatigut tarninik atausiákânik sagdlusuíssúmik ĸularungnaersitaussoĸartarpoĸ, oĸauserdlo nuánârutigalugo ilagsisimagângamíko inoĸatitik nalunaerúmik tipaitsungnartumik oĸalugtũtarpait.

bîbile tigumiardlugo inôĸatigîngne inuit ássigĩngitsut iluarsaerĸingnerup ajoĸersûtai igdlersortalerpait. katûgdlit palasertatik mátútutdlo kisîsa bîbilimik ilisimassagssarsiortugssautisimavdlugit mãnákut tamáko savssarĸuvait ajoĸersûtit nutât akornusersorĸuvdlugit kisiáne palasit mátútutdlo bîbilimik Gûtivdlũnît píssauneĸarneranik nalussûnerardlugitdlo ajoĸersuinerdlugtûneragkamingnit saperssisitauvdluínarput. atuagkiortoĸ katûliussoĸ agdlagpoĸ: "ajoraluaĸissumik Lutherip isumaĸatigissane akuerssisísimavai agdlagkat iluartut kisîsa tatigerĸuvdlugit." inuit katerssûtdlutik sagdlusuíssut angutinit angnikitsuínarmik ilíniartitausimassunit oĸalûserineĸartitdlugo agdlâtdlo ugperissagssanik ilisimatûnik oĸaloĸateĸartitdlugit tusarnâriartortarput. angutit pingârtorssûniaraluartut kángunartumik nalussũssusiat erssersíneĸartarpoĸ agssortũssutait Gûtip oĸausiata ajoĸersûtânik pâsinardluartumik akineĸarângata. sulissartut, sákutût arnatdlo, agdlâtdlume mêrĸat bîbilimik ilisimassaĸarnerussarput palasinit ilisimatûnitdlo.

katûgdlit palasîsa katerssũtítagkatik ikiliartortut pâsigamíko nâlagkersuissut ikiortigssarsiariniaraluarpait periautsitdlo atorsínaussatik tamaisa atordlugit isumaĸatigisimassatik utertíniaraluardlugît. kisiáne inuiaĸatigît ajoĸersũme nutâme tarnimíkut nãmagissartik navssârisimavât, taimáitumigdlo ĸalipakuínarnik, tássa ilagîngne ugperissapalâlingnik ilerĸuínarnik inungnitdlo oĸalugtuarsiáinarnik túniússiniáinartut tunúpait.

sagdlusuíssúmik ilungersûtigingnigtut malerssugaulerângamik Kristusip oĸausia nâlagtarpât: "nunaĸarfîtdle ardlãne ĸinugigpase, avdlamut ĸimâgitse." (Mat. 10, 23). ĸáumarĸut tamanut ĸáumarsailerpoĸ. ĸimâssut tamane tamâne ilagsivdluarneĸardlutik igdlusímavigssarsissarput, uníngatitdlutigdlo Kristuse nalunaiautigissarpât. ilãníkut oĸalugfingme, tássanilo perĸussáungíkunik inuínait igdluine silamilũnît. tusâjumassoĸarfik sumĩtordlũnît iluartumik nâlagfigissarpât. sagdlusuíssut taima sákortutigissumik ugpernardluínartigissumigdlo nalunaiautigineĸardlune unigtitagssáungitsumik siaruarpoĸ.