Osku ja buorredohkálašvuohta

Go Bassi Vuoigŋa lea boktán du oamedovddu don leat oaidnán muhtun ráje suttu bahávuođa dan fámu, dan verrodaga ja vártnuhisvuođa; ja dus sivvu soaigá dan geahčadettiinat. Don dovddat, ahte suddu lea earuhan du Ipmilis, ja ahte don leat bahávuođa vuimmiid šlávan. Mađi eanet don vikkat das beasadit, dađi eanet don šattat dovdat iežat geahnohisvuođa. Du áigumušat leat buhtismeahttumat ja du váibmu lea nuskon. Don oainnát, ahte du eallima deavdá iešráhkisvuohta ja suddu. Don háliidat oažžut ándagassiiaddojumi, šaddat buhtisin ja friddjan. Mo don sáhtát beassat Ipmila oktavuhtii ja šaddat su láhkásážžan?

Don dárbbašat ráfi - almmi ándagassiiaddojumi, ráfi ja ráhklsvuođa sillosat. Ruđain dan ii sáhte oastit, jirpmiin dan ii sáhte háhkat, viisodagain dan ii sáhte vuoitit; goassege don it sáhte doaivut fidnet dan iežat rahčamiin. Muhto Ipmil fáluha dan midjiide attás, "almmá ruđaid haga ja almmá mávssu haga" (Jes. 55: 1). Dat lea du, jus beare háliidat geiget gleđat ja váldit dan. Hearrá cealká: "Jus din suttut leat nugo purpor, de dat galget šaddat vielgadin dego muohta; jus dat leat ruoksadat dego skárlat, de dat galget šaddat dego ullut" (Jes. 1: 18). "Mun áiggun addit didjiide ođđa váimmu, ja ođđa vuoiŋŋa mun áiggun addit din sisa" (Hesekiel 36: 26).

Don leat dovddastan suttuidat ja váimmustat heaitán suddudeames. Leat mearridan addit iežat Ipmilii. De mana su lusaja bivdde su bassat suttuidat eret ja addit dutnje ođđa váimmu. Ja de oskko, ahte son dan ollašuhttá, danin go son lea dan lohpidan. Jesus oahpahii dalle go son lei dáppe eatnan alde, ahta attus, man Ipmil lea midjiide lohpidan, lea min, dalán go mii oskut iehčamet dan oažžut. Jesus buoridii olbmuid sin dávddain, dasgo sii osko su fápmui; son veahkehii sin áššiin, maid sáhtii oaidnit, ja nu son láidii sin luohttit áššiide, maid sii eai sáhttán oaidnit ja dákko bokti láidii sin oskut, ahte sus lea váldi addit suttuid ándagassii. Dán son dajai čielgasit buoridettiinis lámis olbmá: "Vai dii galgabehtet diehtit, ahte Olbmo Bártnis lea fápmu suttuid ándagassii addit eatnama alde, de - son celkkii lámis olbmái: lihka bajás, váldde gávnniidat ja mana vissosat" (Matt. 9: 6). Nu maiddái evangelista Johanas Kristusa oavdudaguid birra sártnodettiinis: "Dát lea čallojuvvon, vai dii oskubehtet, ahte Jesus lea Kristus, Ipmila Bárdni, ja vai dis oskku bokte lea eallin su nama dihte" (Joh. 20: 31).

Biibbala ovttageardán muitalusat das, mo Jesus buoridii buohččiid, sáhttet oahpahit midjiide, mo mii galgat oskut sutnje vai oččošeimmet suttuideamet ándagassii. Muittašeadnotmat dan, mii lea muitaluvvon dan lámis olbmo birra, gii veallái Betesda láddo gáttis; son ii lean geavahan lahtuidis golmmalogi gávcci jahkái. Muhto Jesus celkkii sutnje: "Váldde gávnniidat ja mana." Buohcci olmmái livččii sahttán dadjat: "Hearrá, jus don háliidat dahkat mu dearvvasin, de dagan nugo don gohčut" Muhto ii, son oskkui Kristusa sániide, oskkui iežas dearvvasman, ja geahččalii dalán. Son háliidii vázzit ja son vázzilii. Son doaimmai luohtedettiin Kristusa sániide, ja Ipmil attii návccaid. Son lei dearvvasman.

Seammá láhkái donge leat suttolaš. It don sáhle ieš soabahit ovddeš suttuidat, it don sáble váimmot nuppástuhttit itge dahkat iežat bassin. Muhto Ipmil lohpida buot dan dahkat Kristusa bokte. Dan lohpádussii don galggat oskut. Don dovddastat suttuidat ja attát iežat Ipmilii. Dus lea dáhttu su bálvalit Seamma sihkkarit go don dan dagat, de Ipmil ollašuhttá sániidis dutnje. Jus oskkut lohpádussii - oskkut, ahte leat ožžon suttuid ándagassiiaddojumi ja buhtástusa de Ipmil dan ollašuhttá. Don oaččut dálkkastusa, aiddo nu mo Kristus attii lámis olbmái návccaid vázzilit, go son oskkui iežas dearvvasman. Nu lea, nugo don oskkut

Ale vuordde dassái go orut dovdamin iežat dearvvasman, muhto cealkke: "Mun oskkun, nu dat lea, ii danin go mun orun dovdamin, muhto danin go Ipmil lea lohpidan."

Jesus cealká: "Buot, maid dii bivdibehtet rohkadaladettiin, oskot, ahte dii oažžubehtet dan, de dat didjiide dáhpáhuvvá" (Mark. 11: 24). Dán lohpádussii gullá eaktu - ahte mii rohkadallat Ipmila dáhtu mielde. Su dáhttu lea buhtistit min suttus, dahkat min iežas mánnán ja dahkat midjiide vejolažžan eallit bassi eallima. Mii sáhttit bivdit dákkár buressivdnádusaid ja oskut iehčamet daid oažžut, ja giitit Ipmila das, go leat daid ožžon. Mis lea ovdavuoigat vuohta mannat Jesusa lusa ja šaddat buhtistuvvot ja loaiddastit lága ovdii heahpankeahttái ja almmá oamedovddu váivviid haga. "De ii leat nappa dalle mihkkege dubmehusaid sidjiide, guđet leat Jesus Kristus siste, guđet eai vádjol oačči mielde, muhto vuoiŋŋa mielde" (Paulus g. Rom. 8: 1).

Dan rájes don it leat šat iežat oapmi, don leat divrasit ostojuvvon. "Dieđedettiin, ahte ehpet dii nohkavaš omiiguin, silbbain dahje golliin, leat ostojuvvon, . . . . muhto Kristusa divrras varaiguin, nugo máinnehis ja vigihis lábbá varaiguin" (1. Biehtár g. 1: 18, 19, 1 ). Dan ovttageardán dagu bokte, ahte don oskkut Ipmilii lea Bassivuoigŋa sivdnidan ođđa eallima du válbmui. Don leat dego Ipmila bearrašii riegádan mánná, son ráhkista du dego iežas Bártni.

Go don dal leat addán iežat Jesusii, de ale geassát ruovttoluotta, ale vuolgge su luhtte eret, muhto dágut juohke beaivve: "Mun gulan Krilstusii; mun lean sutnje iehčan addán", ja bivdde su dutnje Vuoiŋŋas addit ja árpmuinis du várjalit. Seamma láhkái go don šattat Ipmila mánnán sutnje iežat attedettunat ja sutnje oskkodettiinat, de seamma láhkái don galggat sus eallit Apostal cealká: Nugo dii nappo lehpet vuostáiváldán Kristus Jesusa hearrán, nu vádjolehket su siste" (Paulus g. Kol. 2: 6).

Soapmásat orrot oaivvildeamen, ahte sii fertejit vuos geahččaluvvot ja čajehit Hearrái, ahte sii leat dahkan jorgalusa, ,ovdalgo sii sáhttet bivdit su buresivdnádusaid. Muhto sii sahttet vuordlt Ipmtla buressivdnádusaid aiddo dál. Headjuvuođasteaset sii dárbbašit su árpmu, Kristus vuoiŋŋa, dasgo muđui sii eai nákce vuosttildit bahá. Jesus liiko, go mii boahtit su lusa dakkáražžan go mii leat: suttolažžan, njuolvin ja veahki dárbbašeaddjin. Mii oažžut boahtit buot headjuvuođaineamet, jallavuodaineamet ja suttolašvuođaineamet ja gáhtavažžan luovdádit su julggiid ovdii. Son háliida salastit min ráhkisvuođa gieđaiguin, čatnat min háviid ja buhtistit min buot nuoskivuođas.

Dákko buohta duháhat olbmot meaddáduvvet. Sii eai jáhke, ahte Jesus addá ándagassii juohkeoktii sierra, persovnnalaččat. Sii eai jáhke Ipmila sátnái. Buohkain, geat leat miehtan eavttuide, lea ovdavuoigatvuohta diehtit, ahte sii buohkat ožžot suttuideaset ándagassii ánssáškeahttái. Heaitte eret eahpideames, ahte Ipmila lohpádusat eai livčče oaivvilduvvon dutnje. Dat gullet juohke gáhtavaš jorralan olbmui. Kristus addá árpmu ja fámu, ja bálvaleaddji eŋgelat buktet daid iešguđege oskkolaš sillui. Ii oktage olmmoš leat nu suttolaš, ahte son ii sáhtáše oažžut fámu, buhtisvuođa ja vánhurskkisvuođa Jesusis, gii su ovddas jámii. Son vuordá beassat nuollat olbmuin sin suttus duolvan ja nuskon biktasiid; son fállá eallima, ii japmima.

Ipmil ii meannut minguin nu mo jámolaš olbmot meannudit gaskaneaset. Su jurdagat leat vánhurskkisvuođa, ráhkisvuođa ja láđđáseamos njuorasvuođa jurdagat. Son cealká: "Heitos ipmilmeahttun su geainnus, ja vánhurskkismeahttun su jurdagiiddis, ja jorgalehkos Hearrá guvlui, de galgá son árpmihit su badjelii, ja min Ipmileamet guvlui, dasgo son galgá eatnatgeardásaččat ándagassii addit". "Mun sihkun eret du rihkkumušaid nugo mierkká ja du suttuid nugo balvva" (Jes. 55: 7; 44: 22).

"Dasgo mun in liiko su jápmimii guhte jápmá, cealká Hearrá, Hearrá: de jorgalehket, ja dii galgabehtet eallit" (Hes. 18: 32). Beargalat lea gearggus rivvet Ipmila buressivdniduvvon lohpádusaid. Son háliida váldit sielus eret uhcimusge doaivvu čuotnama ja čuovgasuotnjara, muhto ale divtte su dan dahkat. Ale guldal geahččaleaddji, muhto cealkke: "Jesus jámii, vai mun beasašin eallit. Son ráhkista mu, iige dáhto mu heavvanit. Mus lea árkkálmasti almmálas Áhčči, ja vaikke mun leange boastut geavahan su ráhkisvuođa ja skihtardan daid buressivdnádusaid, maid son lea munnje addán, de áiggon čuožžillit ja vuolgit Áhččan lusa cealkkedettiinan: "Áhčážan, mun lean suddudan almmi vuostái ja du ovddas, inge leat šat dohkálaš gohčoduvvot du bárdnin; daga mu iežat bálván." Veardádusas muitaluvvo, mo čádjáduvvan olmmoš vuostáiváldojuvvo: "Go son leai ain guhkkin eret, de áhčči áiččai su ja árkkálmasttii su sakka. Son viehkalii bártnis ovddal, dollii su čeabeha birra ja cummistii su" (Luk. 15: 18-20).

Muhto dát veardádus, buot láđisvuođainis ja njuorranemiinis, ii liikkáge sáhte dievaslaččat govvidit min almmálaš áhččámet ravdatmeahttun árkkálmastinvuođa. Hearrá cealká profehta bokte: "Agálaš ráhkisvuođain mun lean ráhkistan du, dan dihtii mun lean áimmuin atnán árbmugasvuođa du vuostai" (Jer. 31: 3).

Go suttolaš lea ain guhkkin eret Áhči viesus ja skihtarda opmodagas olgoeatnamis, de Áhči váibmu cahká su dihtii, ja go siellu áibbašišgoahtá ruoktut Ipmila lusa, de dat lea Áhči Vuoiŋŋa láđis bovdehus, mii oasuha, giktala ja geassá čádjáduvvan olbmo Áhči ráhkislaš váimmu lusa.

Sáhtátgo eahpidit, go Biibbala eatnat lohpádusat leat du ovddas? Sáhtátgo jáhkkit, ahte go váivván suttolaš háliida máhccat ja suttuinis luohpat, de Hearrá goavisvuođain hehttešii su gáhtavažžan boahtimis su julggiid ovdii? Eret dakkár jurdagát! Ii mihkkege sáhte vahágahttit du sielu eanet go dakkár ipmárdus almmálaš Áhčisteamet. Son vašuha suttu, muhto ráhkista suttolačča ja attii iežas Kristusis, vai buohkat geat dáhtozit, sáhtásedje bestojuvvot ja oažžut agálaš ávdugasvuođa hearvásvuođa riikkas. Livččiigo son sáhttán válljet gievrrat dahje láđđáset sániid almmuhettiinis midjiide ráhkisvuođas? Son cealká: "Vajáldahttágo nisu njammimánás, nu ahte son ii árkkálmastte su heakkas bártni badjelii? - Jus velá sii vajáldahtežitge, de mon in almmatge vajáldahte du" (Jes. 49: 15).

Bajit čalmmiidat, don gii eahpidat ja doarggistat, dasgo Jesus eallá rohkadallan várás du beales. Giitte Ipmila, go son attii su ráhkis Bártnis, ja rohkadala, amas son livčče duššás jápmán doge dihtii. Vuoigŋa bovde du odne. Boađe Jesusa lusa oppa váimmuinat, de sáhlát bivdit sus buressivdnádusa.

Go don logadalat Ipmila lohpádusaid, de muitte, ahte dat muitalit su ravdatmeahttun ráhkisvuođas ja árkkálmastinvuođas. Agálaš ráhkisvuođa viiddis váibmu šálloša suttolačča meariheamet. "Su varaid bokte mis lea lonástus, suttuid ándagassii addojupmi" (Paulus g. Ef. 1:7). Oaččut fal oskut, ahte Ipmil lea du veahkeheaddji. Son háliida ođasmahttit iežas gova olbmos. Go don manat su lusa suttuidat dovddastit ja gáhtavaš váimmuin, son boahtá du lusa árkkálmastinvuođain ja ándagassii addojumiin.